საქართველო, 21 ოქტომბერი, საქინფორმი. საქართველოს საპატრიარქოს საზოგადოებასთან ურთიერთობის სამსახურის ხელმძღვანელის, დეკანოზ ანდრია ჯაღმაიძის ინფორმაციით, საქართველოს ეკლესიისა და კონსტანტინოპოლის საპატრიარქოებს შორის ურთიერთობის საზიანოდ, მორიგი ავანტიურა იგეგმება.

როგორც ანდრია ჯაღმაიძე სოციალურ ქსელში წერს, საქართველოს ეკლესიის ერთ-ერთი სინოდის წევრის დაფინანსებით, თეოლოგები გოჩა ბარნოვი და თამარ მესხი კონსტანტინოპოლის პატრიარქ ბართლომეოს პირველთან შესახვედრად მიემგზავრებიან, სადაც ბარნოვი იტყვის, რომ “ნაციონალური მოძრაობისა“ და სააკაშვილის ხელისუფლებაში მოსვლის შემთხვევაში საქართველოს ეკლესია უკრაინის ახლად შექმნილი ეკლესიის ავტოკეფალიას აღიარებს.

ანდრია ჯაღმაიძის მტკიცებით, იქნება თხოვნაც, რომ მსოფლიო პატრიარქმა მიხეილ სააკაშვილის მხარდამჭერი განცხადება საჯაროდ დააფიქსიროს.

„ჩემი ინფორმაციით, (წყაროს არ დავასახელებ) საქართველოს ეკლესიისა და კონსტანტინოპოლის საპატრიარქოებს შორის ურთიერთობის საზიანოდ, მორიგი ავანტიურა იგეგმება გოჩა ბარნოვისგან.

ერთ-ერთი საქართველოს ეკლესიის სინოდის წევრის (სახელს არ დავასახელებ, ჯერჯერობით) დაფინანსებით, ხვალ 19 ოქტომბერს გოჩა ბარნოვი და თამარ მესხი მიემგზავრებიან სტამბულში მის ყოვლადუწმინდესობა, კონსტანტინოპოლის პატრიარქ ბართლომეოს პირველთანთან.

შეხვედრაზე გ. ბარნოვი ეტყვის, რომ პარტია “ერთიანი ნაციონალური მოძრაობის“ და სააკაშვილის ხელისუფლებაში მოსვლის შემთხვევაში, საქართველოს ეკლესია აღიარებს უკრაინის ახლად შექმნილი ეკლესიის ავტოკეფალიას. ამასთან, "თეოლოგი" გეგმავს მსოფლიო პატრიარქს სთხოვოს ადგილობრივი თვითმმართველობის არჩევნების მეორე ტურში პარტია “ერთიანი ნაციონალური მოძრაობის“ და მ. სააკაშვილის მხარდასაჭერი განცხადების საჯაროდ დაფიქსირება”, - წერს „ფეისბუქზე“ ანდრია ჯაღმაიძე.