თბილისი, 19 ივნისი, საქინფორმი. ბაგრატის ტაძრის აღდგენითი სამუშაოები შეჩერებულია. ამის შესახებ კულტურული მემკვიდრეობის დაცვის ეროვნული სააგენტოს ხელმძღვანელმა ნიკა ვაჩეიშვილმა განაცხადა. მისი თქმით, სიამოვნებით შეასრულებენ კათოლიკოს-პატრიარქის თხოვნას და ტაძრის რეაბილიტაციის დეტალებს როგორც საზოგადოებას, ისე საპატრიარქოს წარმომადგენლებს გააცნობენ.

„ავუხსნით საზოგადოებას, როგორი რუდუნებით და ტოტალური ამოცანების ამოხსნით მიმდინარეობს აქ რესტავრაცია. ის ბრალდებებიც და გამოთქმული კრიტიკაც შეგვიძლია პუნქტობრივად გავიაროთ და დარწმუნებული ვარ, საზოგადოება აზრს შეიცვლის. შეჩერების დრო უნდა გამოვიყენოთ მეტი შეჯერებისთვის, კონსოლოდაციისთვის და მალე, იმედი მაქვს, ბაგრატის ტაძრის აღმშენებლობის ბოლო სტადია განახლდება“, – აღნიშნა ნიკა ვაჩეიშვილმა.

საქართველოს კათოლიკოს-პატრიარქმა, მცხეთა-თბილისის მთავარეპისკოპოსმა, ბიჭვინთისა და ცხუმ-აფხაზეთის მიტროპოლიტმა, უწმიდესმა  და უნეტარესმა ილია მეორემ საკვირაო ქადაგებისას ბაგრატის ტაძრის რეაბილიტაციის დაუყოვნებლივ შეჩერება მოითხოვა. უწმიდესმა და უნეტარესმა ბრძანა, რომ ბევრი რამ არასწორად კეთდება და ეს ყველაფერი იმის გამო ხდება, რომ რესტავრაცია თვითნებურად და საპატრიარქოსთან შეუთანხმებლად მიმდინარეობს.

ილია მეორემ განაცხადა, რომ საპატრიარქო და მასთან არსებული სპეციალური კომისია აღნიშნულთან დაკავშირებით შეხვედრებს გამართავს იუნესკოს წარმომადგენლებთან, ასევე, იმ მშენებლებთან, რომლებიც სარესტავრაციო სამუშაოებს აწარმოებდნენ.