პოლიტიკა
მინისტრთა ნაწილი მუშაობას დღეს იწყებს
თბილისი, 26 ოქტომბერი, საქინფორმი. ორშაბათს, 29 ოქტომბერს, მას შემდეგ, რაც ქვეყნის მეთაური ხელს მოაწერს მინისტრთა კაბინეტის შემადგენლობას, საქართველოს ახალი მთავრობა მუშაობას ოფიციალურად შეუდგება. მინისტრთა ნაწილი კი უწყებებში დღესვე მივა, რადგან, როგორც სასჯელაღსრულების, პრობაციისა და იურიდიულ საკითხთა მინისტრმა სოზარ სუბარმა განაცხადა, „დრო არ ითმენს“.
ენერგეტიკის მინისტრ კახა კალაძის განცხადებით, ის დღესვე გაიცნობს ახალ კოლექტივს, რომლის უმრავლესობა უწყებაში მუშაობას გააგრძელებს. დღესვე ეწვევა მისდამი დაქვემდებარებულ უწყებას საგარეო საქმეთა მინისტრი მაია ფანჯიკიძეც.
შეგახსენებთ, რომ გუშინ პარლამენტმა პლენარულ სხდომაზე ხმათა უმრავლესობით (88 ხმა) ნდობა გამოუცხადა მთავრობის შემადგენლობას. საპარლამენტო უმცირესობამ კი ახალ მთავრობას მხარი არ დაუჭირა. გუშინვე გაიმართა ახალი მთავრობის პირველი სხდომაც პრემიერ-მინისტრ ბიძინა ივანიშვილის ხელმძღვანელობით.
