საქართველო, 17 იანვარი, საქინფორმი. დაიწყო საქართველოს პრემიერ-მინისტრ ბიძინა ივანიშვილის ოფიციალური ვიზიტი სომხეთში. საქართველოს დელეგაციას, რომელსაც პრემიერ-მინისტრი ბიძინა ივანიშვილი ხელმძღვანელობს, სომხეთის საერთაშორისო აეროპორტში სომხეთის პრემიერ-მინისტრი ტიგრან სარგსიანი და მთავრობის სხვა წევრები დახვდნენ. დელეგაციაში, ასევე, შედიან საგარეო საქმეთა მინისტრი, ფინანსთა მინისტრი, ეკონომიკისა და მდგრადი განვითარების მინისტრი, ენერგეტიკისა და ბუნებრივი რესურსების მინისტრი, პრობაციისა და იურიდიული დახმარების მინისტრი, რეინტეგრაციის მინისტრი, კულტურის მინისტრი, ასევე, ცნობილი პოეტი და მთარგმნელი გივი შახნაზარი.

საქართველოს პრემიერ-მინისტრის ოფიციალური ვიზიტის ფარგლებში შედგა ბიძინა ივანიშვილისა და ტიგრან სარგსიანის პირისპირ  შეხვედრა. მხარეებმა ორ ქვეყანას შორის პოლიტიკური და ეკონომიკური  ურთიერთობებისა  და თანამშრომლობის  გაღრმავების პერსპექტივებზე იმსჯელეს.  საქართველოს პრემიერ-მინისტრის განცხადებით,  ყველა საკითხი კეთილმეზობლური პოლიტიკის კონტექსტში უნდა გადაწყდეს.

შემდეგ  გაიმართა საქართველოსა და სომხეთის რესპუბლიკის ოფიციალურ დელეგაციათა მოლაპარაკებები. შეხვედრის მთავარი თემა სომხეთ-საქართველოს შორის არსებული ურთიერთობები და ამ ურთიერთობების გაღრმავების გზები გახლდათ.

დღის მეორე ნახევარში, საქართველოს დელეგაცია ეწვევა ეჩმიაძინის საკათედრო ტაძარს, რის შემდეგაც დაგეგმილია საქართველოს პრემიერის შეხვედრა სრულიად სომხების კათალიკოს გარეგინ მეორესთან. ვიზიტის დასასრულ კი საქართველოს პრემიერ-მინისტრის პატივსაცემად სომხეთის რესპუბლიკის პრემიერ-მინისტრ ტიგრან სარგსიანის სახელით გაიმართება ოფიციალური სადილი.