საქართველო, 25 იანვარი, საქინფორმი. თავდაცვის სამინისტროს გადაწყვეტილებით, საქართველოში სამხედროების სარეაბილიტაციო ცენტრი გაიხსნება..

ამერიკა-საქართველოს თავდაცვის სფეროში თანამშრომლობის ოფისის დახმარებით თბილისის სარეაბილიტაციო ცენტრი სრული დატვირთვით მომავალ წელს ამოქმედდება. ამერიკული მხარე თავდაცვის სამინისტროს როგორც ტექნიკური აღჭურვილობით, ისე კადრების გადამზადებაშიც დაეხმარება.

ამერიკული მხარის განცხადებით, თბილისში ჩამოსული ექსპერტთა ჯგუფი ამერიკისა და ევროპის სამეთაურო შტაბიდან საქართველოში ამპუტირებულთა სამედიცინო დახმარების ცენტრის შესაქმნელად ამ კუთხით დაეხმარება: „ჩვენი პროგრამა ითვალისწინებს იმ მეთოდებით მკურნალობას, როგორსაც ქართველ მებრძოლებს უტარებენ შეერთებულ შტატებში. ჩვენი ერთობლივი შეხვედრები ჩვენს ქვეყნებს შორის ერთობლივი მჭიდრო თანამშრომლობის კარგი მაგალითია“.

საქართველოს თავდაცვის სამინისტროს წარმომადგენლები დარწმუნებული არიან, რომ პერსონალის გადამზადებისა და თანამედროვე აღჭურვილობის შეძენის შემთხვევაში სარეაბილიტაციო ცენტრი სამხედროების როგორც ფიზიკურ, ისე ფსიქოლოგიურ რეაბილიტაციასაც შეძლებს.