პოლიტიკა
ევროკავშირი საქართველოს რუსეთთან დიალოგში დაეხმარება
საქართველო, 29 იანვარი, საქინფორმი. ევროკავშირი საქართველოს ტერიტორიული მთლიანობის აღდგენის თაობაზე რუსეთთან დიალოგის წარმართვაში დაეხმარება იმ პირობით, თუ საშინაო პოლიტიკაში ქვეყანა ევროპულ სტანდარტებს დაიცავს. ამის შესახებ პოლონეთის საგარეო საქმეთა მინისტრმა რადოსლავ სიკორსკიმ ქართველ კოლეგა მაია ფანჯიკიძესთან შეხვედრის შემდეგ განაცხადა.
სიკორსკის თქმით, ახალმა ხელისუფლებამ არა მარტო ფორმალური მოთხოვნები უნდა შეასრულოს ასოციაციის შესახებ შეთანხმებისა და სავიზო დიალოგის ფარგლებში, არამედ საშინაო პოლიტიკა „ევროპული სულისკვეთებით“ უნდა წარმართოს.
„მაშინ ევროკავშირი უწინდებურად დაუჭერს მხარს საქართველოს რუსეთთან დიალოგის წარმართვაში ისე, რომ ტერიტორიული მთლიანობის აღდგენა მოხდეს“, – განაცხადა სიკორსკიმ გუშინ, 28 იანვარს, ფანჯიკიძესთან ერთობლივ პრესკონფერენციაზე.
