აქტუალური
პრემიერი დემოგრაფიული განვითარების ფონდის დაარსებას მიესალმება
საქართველო, 4 მარტი, საქინფორმი. საქართველოს პრემიერ-მინისტრი ბიძინა ივანიშვილი მიესალმება დემოგრაფიული განვითარების ფონდის დაარსების ინიციატივას. „ვფიქრობ, რომ ეს ერთ-ერთი მნიშვნელოვანი ნაბიჯი იქნება საქართველოში არსებული დემოგრაფიული მდგომარეობის გაუმჯობესების მიმართულებით“, – ამბობს პრემიერი მიმართვაში, რომლის თაობაზეც საქინფორმს ივანიშვილის პრესსამსახური ატყობინებს.
პრემიერმა მადლობა გადაუხადა ფონდის დაარსების ინიციატორებს და ყველას, ვინც ამ ფონდში შეტანილი წვლილით უდიდეს სამსახურს გაუწევს ჩვენს ქვეყანასა და მის მომავალს.
საქინფორმის მკითხველს შევახსენებთ, რომ საქართველოს დემოგრაფიული აღორძინების ფონდი გუშინ დაფუძნდა სრულიად საქართველოს კათოლიკოს-პატრიარქის ლოცვა-კურთხევითა და პრემიერ-მინისტრის მხარდაჭერით.ფონდის მთავარი მიზანია საქართველოში დემოგრაფიული მდგომარეობის გამოსწორება. ფონდში შექმნილ ექსპერტთა საბჭოში შევლენ როგორც პროფესიონალი დემოგრაფები, ისე სხვადასხვა უწყების წარმომადგენლები, რომლებიც შეიმუშავებენ ერთობლივ სახელმწიფო პოლიტიკას.
ფონდს ღია მხარდაჭერას უცხადებენ უცხოეთში მოღვაწე მომღერლები თამარ გვერდწითელი და ვალერი მელაძე.
ფონდის საპატიო თავმჯდომარეა პარლამენტის ჯანდაცვის კომიტეტის თავმჯდომარე დიმიტრი ხუნდაძე. ფონდს ჰყავს ექვსი დამფუძნებელი: დიმიტრი ხუნდაძე, მანანა კობახიძე, ზაქარია ქუცნაშვილი, თამარ ჩიბურდანიძე, ანზორ თოთაძე და თაკო ჩხეიძე.
