პოლიტიკა
გიგა ბოკერია შესაძლოა გია ხუხაშვილმა ჩაანაცვლოს
საქართველო, 3 მაისი, საქინფორმი. სააგენტო "პრაიმერის" მიერ გავრცელებული ინფორმაციით, უშიშროების საბჭოს მდივანი გიგა ბოკერია შესაძლოა გია ხუხაშვილმა ჩაანაცვლოს. "პრაიმერის" ცნობით, აღნიშნული ცვლილება საპრეზიდენტო არჩევნების შემდეგ იგეგმება, რადგან უშიშროების საბჭოს მდივანს პრეზიდენტი ნიშნავს. მიხეილ სააკაშვილის საპრეზიდენტო ვადის ამოწურვამდე კი ამ საკადრო ცვლილების განხორციელება მხოლოდ ბოკერიას დაკავების შემთხვევაშია შესაძლებელი.
"პრაიმერის" ინფორმაციით, სწორედ აღნიშნული გეგმის ნაწილია პროკურატურის მხრიდან ბოკერიას უწყებით დაინტერესება და სახელმწიფო თანხების ხარჯვასთან დაკავშირებით გამოძიების დაწყება. ამავე მიზეზით დაინიშნა ხუხაშვილი ოფიციალურად პრემიერის მრჩევლად, თუმცა ამ მოვალეობას არჩევნების შემდგომი პერიოდიდან ასრულებდა.
ვინაიდან ძალოვანი უწყებები უშიშროების საბჭოს მდივნის კურაციის სფეროში შედიან, აღნიშნულ პოსტზე დანიშვნის შემდეგ ხუხაშვილი ეკონომიკურ სფეროსთან ერთად ძალოვან მინისტრებზეც ოფიციალურ გავლენას მოიპოვებს.
