პოლიტიკა
სააკაშვილი: „მომიტევეთ, თუ რომის იმპერატორის ცხენზე საუბრისას უნებლიეთ ნერონის სახელი წამომცდა კალიგულას ნაცვლად“
საქართველო, 13 მაისი, საქინფორმი. პრემიერ-მინისტრი ხშირად იცვლის აზრს და არჩევნებამდე, შესაძლოა, საპრეზიდენტო კანდიდატთან დაკავშირებით კიდევ შეიცვალოს აზრი. ამის შესახებ პრეზიდენტმა სააკაშვილმა კოალიცია „ქართული ოცნების“ მიერ პრეზიდენტობის კანდიდატად ვიცე-პრემიერ მარგველაშვილის წარდგენის კომენტირებისას განაცხადა.
„ჩვენი საზოგადოება არის ანგარიშგასაწევი ძალა, იმსახურებს პატივისცემას და ღირსეულად მოპყრობას. რა შეეხება კონკრეტულ კანდიდატურებს, პრემიერ-მინისტრი ხშირად იცვლის აზრს და ნამდვილად არ გამოვრიცხავ, რომ არჩევნებამდე რამდენიმე თვეა და მან მოგვიანებით კიდევ შეცვალოს აზრი ამ კანდიდატურასთან დაკავშირებით“, - განაცხადა სააკაშვილმა.
ცოტა მოგვიანებით კი პრეზიდენტის „ფეისბუქის“ ოფიციალურ გვერდზე გავრცელდა განცხადება, სადაც სააკაშვილი აღნიშნავს: „მომიტევეთ, თუ რომის იმპერატორის ცხენზე საუბრისას უნებლიეთ ნერონის სახელი წამომცდა კალიგულას ნაცვლად...სამწუხაროდ, ამ შემთხვევაში ლაფსუსზე მეტად შინაარსია გადამწყვეტი და სრულიად არ მახარებს ამ მაგალითის ჩვენი ქვეყნის კონტექსტთან დაკავშირება“.
