სამართალი
დააკავეს ბათუმის მერიის თანამშრომლები
საქართველო, 21 მაისი, საქინფორმი. ფინანსთა სამინისტროს საგამოძიებო სამსახურის თანამშრომლებმა სახელმწიფო თანხების მითვისება-გაფლანგვისა და სამსახურებრივი გულგრილობის ფაქტზე დააკავეს ქალაქ ბათუმის მერიის კეთილმოწყობის სამსახურის თანამშრომლები: ტარიელ მახარაძე, ნოდარ მამულაძე და რამაზ დევაძე, ასევე შპს „ლინდეკ ჯორჯიას“ წარმომადგენლები: მამუკა ნაცვლიშვილი, მალხაზ კოხრეიძე და თემურ გუნია.
გამოძიებით დადგინდა, რომ ბათუმის მერიამ ველობილიკების მოსაწყობად შპს "ლინდეკ ჯორჯიასთან" 941 515 ლარის ღირებულების სამი ხელშეკრულება გააფორმა. შპს-მ ხელშეკრულებით გათვალისწინებული სამუშაოები ნაწილობრივ შეასრულა და დოკუმენტებში ყალბი მონაცემების შეტანით 417 000 ლარი მიითვისა. ბათუმის მერიის თანამშრომლებმა კი სამსახურებრივი გულგრილობა გამოიჩინეს და არასრულად შესრულებულ სამუშაოთა მიღება-ჩაბარება მოახდინეს.
შპს „ლინდეკ ჯორჯიას“ წარმომადგენელთა საქმეზე გამოძიება საქართველოს სისხლის სამართლის კოდექსის 182-ე მუხლის მესამე ნაწილით მიმდინარეობს, რაც 7-დან 11 წლამდე თავისუფლების აღკვეთას ითვალისწინებს. მერიის თანამშრომელთა საქმეზე კი გამოძიება 342-ე მუხლის პირველი ნაწილით მიმდინარეობს, რაც 2-დან 5 წლამდე თავისუფლების აღკვეთას ითვალისწინებს.
