საზოგადოება
,,თავისუფალი ზონის" წევრებს 400-ლარიანი ჯარიმები დაეკისრათ
საქართველო, 11 ივლისი, საქინფორმი. ორგანიზაცია ,,თავისუფალი ზონის" 3 წევრს, რომლებიც პოლიციამ 7 ივლისს “დინამო არენასთან" აქციის მსვლელობისას დააკავა, სასამართლომ 400-ლარიანი ჯარიმები დააკისრა. ლაშა რუხაიას, ირაკლი ჩხვირკიას და დავით გოგოხიას ბრალი ხულიგნობასა და პოლიციისთვის წინააღმდეგობის გაწევაში ედებოდათ.
7 ივლისს „თავისუფალი ზონის“ წარმომადგენლები თბილისის „დინამოსა" და მოსკოვის „დინამოს“ ამხანაგურ მატჩზე რუსი დეპუტატების დასწრებას აპროტესტებდნენ.
ორგანიზაციის წევრები ამბობენ, რომ აქციის მსვლელობის დროს საზოგადოებრივი წესრიგი არ დაურღვევიათ და აქვთ კადრები, სადაც ჩანს, როგორ ხევს პოლიციელი მათ პლაკატს. მათ ეს კადრები გუშინდელ პრესკონფერენციაზე წარმოადგინეს.
 |
 |
