აქტუალური
დიპლომატიური სამსახურების ხელმძღვანელები პარლამენტის გვერდის ავლით დაინიშნებიან
საქართველო, 6 სექტემბერი, საქინფორმი. დიპლომატების დამტკიცების საქმეში პარლამენტი აღარ ჩაერევა. "დიპლომატიური სამსახურის შესახებ" კანონში დაგეგმილი ცვლილებების გათვალისწინებით, დიპლომატიური სამსახურების ხელმძღვანელ პირებს პრეზიდენტი და მთავრობა, პარლამენტის გვერდის ავლით დანიშნავს და მოხსნის. სადღეისოდ მოქმედი კანონით, დიპლომატიური წარმომადგენლობის ხელმძღვანელს პრეზიდენტი თანამდებობაზე პარლამენტის თანხმობის მიღების შემდეგ, ათი დღის ვადაში ნიშნავს, ხოლო თანამდებობიდან ანთავისუფლებს საგარეო საქმეთა მინისტრის წარდგინებით.
"დიპლომატიური სამსახურის შესახებ" კანონში დაგეგმილი ცვლილებების ავტორი და ინიციატორი საგარეო ურთიერთობათა საპარლამენტო კომიტეტის წარმომადგენლები თედო ჯაფარიძე და ანი მიროტაძე არიან.
"მიმაჩნია, რომ წარმოდგენილი ცვლილება სწორი არ არის, მაგრამ კონსტიტუცია, რომელიც საპრეზიდენტო არჩევნების შემდეგ უნდა ამოქმედდეს, ელჩების დამტკიცებაში პარლამენტის როლს არ ითვალისწინებს. ამ მხრივ აღსანიშნავია, რომ არამხოლოდ პარლამენტის როლი კნინდება, არამედ ელჩებსაც, რომლებიც პარლამენტის მიერ არიან დამტკიცებულნი, ბევრად მაღალი ლეგიტიმაცია გააჩნიათ", - განაცხადა მიროტაძემ.
