საქართველო, 17 სექტემბერი, საქინფორმი. გაეროს ინსპექტორები ადასტურებენ, რომ 21 აგვისტოს დამაკოს მახლობლად ქიმიური იარაღი სირიის სამთავრობო ჯარებმა გამოიყენეს, - მიაჩნია აშშ-ის პრეზიდენტის მრჩეველს უსაფრთხოების საკითხებში სუზან რაისს.

„მართალია, ინსპექტორების უფლებამოსილებაში არ შედიოდა პასუხისმგებელ პირთა დადგენა, მაგრამ მათ მიერ წარმოდგენილი ტექნიკური მტკიცებულებები – მათ შორის, მაღალხარისხიან ზარინსა და გარკვეული ტიპის რაკეტებზე - განამტკიცებს ჩვენს შეფასებას, რომ იერიში სირიის რეჟიმმა განახორციელა, იმიტომ რომ ამის საშუალება მხოლოდ მათ აქვთ“, - ნათქვამია რაისის განცხადებაში.

მისივე თქმით, აშშ-ისა და რუსეთის მოლაპარაკებამ გასული კვირის მიწურულს საფუძველი ჩაუყარა სირიის ქიმიური იარაღის არსენალის განადგურებას.