სამართალი
შსს-მ უკანონო ცეცხლსასროლი იარაღი და საბრძოლო მასალა ამოიღო
საქართველო, 11 დეკემბერი, საქინფორმი. შსს-ს ცენტრალური კრიმინალური პოლიციის დეპარტამენტის მე-2 მთავარი სამმართველოს მე-3 სამმართველოს თანამშრომლებმა, ოპერატიული ინფორმაციის საფუძველზე ჩატარებული საგამოძიებო ღონისძიების შედეგად, 1986 წელს დაბადებული, წარსულში სამჯერ ნასამართლევი კონსტანტინე მ. ცეცხლსასროლი იარაღისა და საბრძოლო მასალის მართლსაწინააღმდეგო შეძენა-შენახვის ფაქტზე დააკავეს.
სამართალდამცველებმა დაკავებულის საცხოვრებელი ბინის ჩხრეკისას ამოიღეს „კალაშნიკოვის“ სისტემის 2 ავტომატური ცეცხლსასროლი იარაღი 4 მჭიდითა და 133 საბრძოლო ვაზნით და „მაკაროვის“ სისტემის 2 პისტოლეტი 3 მჭიდითა და 23 საბრძოლო ვაზნით.
დაკავებული ჩადენილ დანაშაულს აღიარებს.
გამოძიება ცეცხლსასროლი იარაღისა და საბრძოლო მასალის მართლსაწინააღმდეგო შეძენა-შენახვის ფაქტზე მიმდინარეობს (სსსკ-ის 236 მუხლის 1-ლი ნაწილით).
