პოლიტიკა
შინაგან საქმეთა მინისტრმა კრიზისების მართვის დროებითი შტაბის შემაჯამებელი სხდომა გამართა
საქართველო, 18 დეკემბერი, საქინფორმი. გუშინ ბათუმში კრიზისების მართვის დროებითი შტაბის შემაჯამებელი სხდომა გაიმართა, რომელსაც შინაგან საქმეთა მინისტრი ალექსანდრე ჭიკაიძე უძღვებოდა. მინისტრმა სხვადასხვა უწყების ხელმძღვანელი პირებისგან აჭარის რეგიონში ჩატარებული სამუშაოების ანგარიში მოისმინა.
„დილიდან მიმდინარეობდა ინტენსიური მუშაობა. დაახლოებით 60-მდე ტექნიკური საშუალება მუშაობდა გზების გაწმენდაზე. ამ ეტაპისთვის ხელვაჩაურის რაიონის სოფლებში: მახინჯაური, ახალშენი, ფერია, შარაბიძეები, თხილნარი, ჭარნალი, ორთუბანი – კიდევ მიმდინარეობს, დამთავრდება რამდენიმე საათში; ქობულეთში: ლაზისტანი, სოფელი ქობულეთი, დავითური, ჭახათი, დაგვა, შუაღელე და სახალვაშო უკვე დასრულებულია. ქობულეთის რაიონში, ჩაქვისთავში დარჩენილია გასასუფთავებელი სამკილომეტრიანი გზის მონაკვეთი, რომელიც ხვალ დილისთვის უკვე მზად იქნება და ზედა აჭყვაში დარჩა ერთკილომეტრიანი მონაკვეთი. ასევე, უმეტეს ნაწილში ელექტრობით მომარაგება აღდგენილი არის.
ორთუბანში დაახლოებით 9 საათიდან 9:30-მდე ელექტრობა ჩაირთვება და ასევე, სახალვაშოში ელექტროენერგია ხვალ მიეწოდება მოსახლეობას. აჭარის მაღალმთიანეთში, ზოგიერთ სოფელში, რომლებშიც გზა ზაფხულშიც არ მიდის, ელექტროენერგიით მომარაგება მიმდინარეობს. ენერგეტიკის სამინისტროს თანამშრომლები უზრუნველყოფენ იმას, რომ 24 რიცხვამდე მაქსიმალურად მოახერხონ და მიიყვანონ ელექტროენერგია მოსახლეობამდე. ეს ყველაფერი დაახლოებით 25-26 რიცხვამდე უნდა მომხდარიყო და ერთ დღეში მოვახერხეთ“, - შეაჯამა ალექსანდრე ჭიკაიძემ დროებითი შტაბის მუშაობა.
