სამართალი
175.000-ლარიანი ავტომანქანა მთავარი პროკურორისათვის...
საქართველო, 27 დეკემბერი, საქინფორმი. მთავარი პროკურორი საზოგადოების ყურადღების ცენტრში კიდევ ერთელ მოექცა, ამჯერად 174 575-ლარიანი ავტომობილით. ოთარ ფარცხალაძისთვის გამოწერილი „ლექსუსის“ მარკის ავტომობილის შეძენის დამადასტურებელ დოკუმენტაციას გოკა გაბაშვილი აქვეყნებს. დეპუტატმა პარლამენტის სხდომაზე მეტი თვალსაჩინოებისთვის ფოტოსურათიც წარადგინა. მისი მტკიცებით, დოკუმენტი, რომელიც მას აქვს, 2013 წლის 10 დეკემბრით თარიღდება. როგორც ირკვევა, მთავარ პროკურორს Lexus LX 570 უყიდეს.
"მაშინ, როცა საზოგადოება ელოდება პასუხს, არის თუ არა მთავარი პროკურორი ყაჩაღობისა და ქურდობისთვის ნასამართლევი და ყველამ იცის, რომ არის, მაშინ, როცა მთავარი პროკურატურა მისი დაბადების თარიღს ვერ ადგენს და ყველამ იცის, რომ დიპლომი ნაყიდი აქვს, მთავარი პროკურორი ამ კვირაში 175 ათას ლარიან ლექსუსს ყიდულობს. ეს არის მართლა სითავხედის ზღვარს მიღმა“, - აცხადებს გოკა გაბაშვილი.
საპარლამენტო უმრავლესობის განმარტებით კი, „მთავრობას მიღებული აქვს გადაწყვეტილება, რომელიც უახლოეს პერიოდში გაჟღერდება - რა სტანდარტები და რა მარკის მანქანები ეყოლებათ მინისტრებს, მათ მოადგილეებს, დეპარტამენტის ხელმძღვანელებს. ვისაც შეძენილი აქვს მანქანა და ის სტანდარტებში არ ჩაჯდება, მოუწევს შეცვლა“.
