საზოგადოება
დარეჯანის სასახლეში რაინდად კურთხევის კიდევ ერთი ცერემონიალი გაიმართა
საქართველო, 20 იანვარი, საქინფორმი. საქართველოს სამეფო სახლის ცნობით, 14 იანვარს თბილისის დარეჯანის სასახლის შენობაში გაიმართა ბრაზილიის პრეზიდენტის აპარატის ისტორიული დოკუმენტაციების საბჭოს წევრის კლაოდიო სოარეს როშას საქართველოს სამეფო სახლის დინასტიური ორდენის რაინდად კურთხევის ცერემონიალი. ბატონი კლაოდიო, ასევე, არის ბრაზილიის საიმპერატორო სახლის მეთაურის, მისი სამეფო-იმპერიული უმაღლესობის დონ ლუი ორლეან-ბრაგანცას ნათესავი.
ინვესტიტურის ცერემონიალს ჯანმრთელობის გამო ვერ ესწრებოდა თავად საქართველოს სამეფო სახლის მეთაური, ბატონიშვილი ნუგზარ ბაგრატიონი-გრუზინსკი, ამიტომ ეს ღონისძიება ჩატარდა მისი მემკვიდრის, ბატონიშვილი ანას უშუალო ხელმძღვანელობით.
ღონისძიებას ესწრებოდნენ საქართველოს სამეფოს გვირგვინის ორდენის კავალრები, მოწვეული სტუმრები.
"ბატონი კლაოდიო სოარეს როშა საქართველოს სამეფო სახლის მეთაურის მიერ ასევე დანიშნულ იქნა საქართველოს სამეფო სახლის ოფიციალურ წარმომადგენლად ბრაზილიაში.
ბატონმა კლაოდიომ უღრმესი მადლიერება გამოხატა იმ პატივისათვის, რაც მას საქართველოს სამეფო სახლმა მიანიჭა და აღუთქვა, რომ დაიცავს არა მარტო საქართველოს სამეფო სახლის ღირსებასა და ინტერესებს, არამედ საქართველოს კეთილდღეობისთვისა და ინტერესებისთვისაც არ დაიშურებს საკუთარ ძალისხმევას", - აცხადებენ საქართველოს სამეფო სახლის წარმომადგენლები.
