სამართალი
რატომ მოიკლა თავი ახალგაზრდა ჟურნალისტმა?
საქართველო, 18 თებერვალი, საქინფორმი. გუშინ, 17 თებერვალს, ორხევში, საკუთარ სახლში ახალგაზრდა ჟურნალისტი თაკო ყურშავიშვილი გარდაცვლილი იპოვეს. გოგონას ჭრილობა ცეცხლსასროლი იარაღით თავში აქვს მიყენებული. თაკო ყურშავიშვილი თბილისის მე-20 საჯარო სკოლის მე-12 კლასის მოსწავლე იყო. მისი კლასის დამრიგებლის ირინა მარანიძის თქმით, თაკო ბოლო ორი კვირის განმავლობაში სკოლას ვირუსის გამო აცდენდა.
აღნიშნულთან დაკავშირებით სხვადასხვა ვერსია ვრცელდება. ერთი მათგანის თანახმად, 18 წლის თაკო ყურშავიშვილმა თავი იმიტომ მოიკლა, რომ მისმა ყოფილმა შეყვარებულმა ცოლი მოიყვანა.
გოგონა საბავშვო-სასწავლო სტუდია TV ინკოგნიტოს კურსდამთავრებულია. მისი პედაგოგის, TV ინკოგნიტოს დირექტორ მანანა გაბრიჩიძის განცხადებით, თაკო ყურშავიშვილს პრობლემები არ ჰქონია.
„გაოგნებული ვარ. არაფერი პრობლემა არ ჰქონია. გუშინ და გუშინწინაც მესაუბრებოდა. სმს-ს მწერდა. მითხრა, გამოგივლითო“, - განაცხადა გაბრიჩიძემ.
თაკო ყურშავიშვილის გარდაცვალების ფაქტზე საქმე სისხლის სამართლის კოდექსის 115-ე მუხლით აღიძრა, რაც თვითმკვლელობამდე მიყვანას გულისხმობს.
