საქართველო, 18 თებერვალი, საქინფორმი. დღეს პარლამენტში, იურიდიული და რეგიონული პოლიტიკისა და თვითმმართველობის კომიტეტების გაერთიანებულ სხდომაზე სამი საათის განმავლობაში ადგილობრივი თვითმმართველობის კოდექსს  განიხილავდნენ. წარადგინეს პრემიერის ინიციატივა მერისა და გამგებლების 50-პროცენტიანი ბარიერით არჩევის შესახებ. ცვლილებების მიხედვით საკრებულოს წევრთა პროპორციული წესით არჩევას 4-%-ანი ბარიერის გადალახვა დასჭირდება, საკრებულოში მუნიციპალიტეტების  წევრთა რაოდენობა იზრდება და 10-ის ნაცვლად 15 აირჩევა.

საპარლამენტო უმცირესობის ძირითადი შენიშვნა და პრეტენზია უკავშირდება საარჩევნო გარემოს. „ჩვენ გვაქვს ძალიან კონკრეტული რეალობა, როდესაც დუშეთში და ხონში დაკავებული არიან "ნაციონალური მოძრაობის" ის წარმომადგენლები, რომლებსაც მონაწილეობა უნდა მიეღოთ გამგებლების არჩევნებში. ამ პირობებში რა ნორმაც არ უნდა ჩაიწეროს კანონში, რაც არ უნდა ლამაზად ჟღერდეს ის ფრაზები, რაც 50-პროცენტიან ბარიერს უკავშირდება საერთოდ არ არის რელევანტური. ამიტომ ჩვენი შენიშვნა არის საარჩევნო გარემოსთან დაკავშირებით და მე ვფიქრობ, რომ ამ არჩევნების ლეგიტიმაციას ძალიან დიდი ჩრდილი უკვე მიადგა", - განაცხადა საპარლამენტო უმცირესობის წევრმა პავლე კუბლაშვილმა.

თავის მხრივ, საპარლამენტო უმრავლესობის წარმომადგენლები აცხადებენ, რომ ვიდრე არჩევნების თარიღი დანიშნული არ არის, საგამოძიებო ორგანოს აქვს შესაძლებლობა, გამოძიება აწარმოოს.