აქტუალური
ირაკლი ალასანია: „შემდეგი ნაბიჯი სწორედ უნდა იყოს კონკრეტული პროგრესი საქართველოს ნატოსთან ინტეგრაციის კუთხით“
საქართველო, 2 მაისი, საქინფორმი. საქართველოს თავდაცვის მინისტრმა ირაკლი ალასანიამ ვაშინგტონში ატლანტიკური საბჭოს მიერ ორგანიზებულ კონფერენციაში მიიღო მონაწილეობა. საერთაშორისო ფორუმის "ერთიანი და თავისუფალი ევროპა" ერთ-ერთი პანელი აღმოსავლეთ ევროპის ქვეყნების თავდაცვის მინისტრებს დაეთმო.
ატლანტიკური საბჭოს მიერ ორგანიზებული ორდღიანი კონფერენციის მონაწილეებს სიტყვით მიმართა აშშ-ის ვიცე-პრეზიდენტმა ჯოზეფ ბაიდენმა. ფორუმში ასევე მონაწილეობა მიიღეს აშშ-ის სახელმწიფო მდივანმა ჯონ კერიმ, ყოფილმა სახელმწიფო მდივანმა მადლენ ოლბრაიტმა, ევროკომისიის პრეზიდენტმა ჟოზე მანუელ ბაროზუმ, ამერიკელმა სენატორმა ჯონ მაკკეინმა და სხვა მაღალი რანგის სტუმრებმა.
პანელზე სახელწოდებით "ერთიანი და თავისუფალი ევროპის ხედვის დაცვა" ირაკლი ალასანიამ საქართველოს ნატოში გაწევრიანების პერსპექტივებზე და სექტემბერში დაგეგმილ ნატოს სამიტზე საქართველოსთვის მაპ-ის მინიჭების საკითხზე ილაპარაკა.
"ატლანტიკური საბჭოს ეს კონფერენცია არის ყველაზე მნიშვნელოვანი შეხვედრა, რომელიც უკრაინის კრიზისის შემდეგ ამ საკითხებზე ჩვენმა დასავლელმა პარტნიორებმა გამართეს. ძალიან მნიშვნელოვანია, რომ ამ კონფერენციაზე დეტალურად იყო განხილული, თუ როგორი პასუხი უნდა გასცეს ამ აგრესიას ნატომ და რა ადგილი უნდა დაიკავონ ამ სტრატეგიაში ასპირანტმა ქვეყნებმა, რომლებსაც უნდათ, რომ ნატოს წევრები გახდნენ. ამ მეტად მნიშვნელოვან ფორუმზე საქართველოს საკითხიც იყო განხილული. ჩვენ მოგვეცა საშუალება გვეთქვა, თუ რამდენად არის მზად საქართველო იმისთვის, რომ გახდეს ნატოს მომავალი წევრი და რამდენად მნიშვნელოვანი წვლილი შეაქვს საქართველოს ევროატლანტიკური უსაფრთხოების უზრუნველყოფაში. ყველა თანხმდება იმაზე, რომ შემდეგი ნაბიჯი სწორედ უნდა იყოს ძალიან მნიშვნელოვანი, კონკრეტული პროგრესი საქართველოს ნატოსთან ინტეგრაციის კუთხით", - განაცხადა ირაკლი ალასანიამ.
