საქართველო, 16 მაისი, საქინფორმი. სახალხო დამცველი უჩა ნანუაშვილი სასჯელაღსრულების დაწესებულების თანამშრომლებს ხელოვნური დაბრკოლებების შექმნაში ადანაშაულებს. ამის შესახებ მან გუშინ გამართულ ბრიფინგზე განაცხადა.

მისივე თქმით, სახალხო დამცველის აპარატი აგრძელებს დახურული დაწესებულებების მონიტორინგს, მათ შორის, დაუგეგმავი ვიზიტების განხორციელებას. თუმცა, ბოლო დროს, განსაკუთრებით აპრილში, სასჯელაღსრულების დეპარტამენტის თანამშრომლებმა ომბუდსმენის აპარატის წარმომადგენლებს ხელოვნურად დაბრკოლებები შეუქმნეს.

მომხდართან დაკავშირებით სახალხო დამცველმა სამსახურებრივი შემოწმების ჩატარების წინადადებით სასჯელაღსრულებისა და პრობაციის მინისტრს უკვე მიმართა. მისი თქმით, წინადადებაში დეტალურად არის აღწერილი სახალხო დამცველის რწმუნებულების საქმიანობისთვის ხელის შეშლის არაერთი შემთხვევა. მისივე თქმით, სასჯელაღსრულების მე-7 დაწესებულებაში რწმუნებულებს დაწესებულების თანამშრომლებმა აგრესიული, შეურაცხმყოფელი ტონით მიმართეს და მოუწოდეს, საგამოძიებო ოთახში შესულიყვნენ. სხვა შემთხვევაში, ნანუაშვილის განცხადებით, სახალხო დამცველის რწმუნებულებს არ აძლევდნენ უფლებას, დაუყოვნებლივ ენახათ პატიმარი საკანში.