სამართალი
გარემოს დაბინძურებისთვის 15 იანვრიდან ჯარიმები ამოქმედდება
საქართველო, 13 იანვარი, საქინფორმი. შსს-ს საპატრულო პოლიციის დეპარტამენტს, გარემოს დაცვის სამინისტროს შესაბამის სამსახურთან ერთად, ახალი კანონის – „ნარჩენების მართვის კოდექსი“-ს აღსრულება ევალება, რომელიც 2015 წლის 15 იანვრიდან ამოქმედდება.
კანონი საყოფაცხოვრებო, მუნიციპალური, სამშენებლო და სხვა ნარჩენების მოძრაობის, დასაწყობების, გადატვირთვის და ნარჩენებით გარემოს დაბინძურების საკითხებს არეგულირებს.
დაჯარიმდებიან იმ ავტოსატრანსპორტო საშუალებების მძღოლები და მგზავრები, რომლებიც ფანჯრიდან გადაყრიან სხვადასხვა სახის ნარჩენებს, იქნება ეს სიგარეტის ნამწვი, კვების პროდუქტის ნარჩენები თუ სხვა. ჯარიმის ოდენობა 120 ლარს შეადგენს.
საპატრულო პოლიცია ასევე მოახდენს შესაბამის რეაგირებას, როცა მოქალაქის მხრიდან ნარჩენების უტილიზაციის მცდელობა იქნება ამისთვის არადადგენილ ადგილზე ან არადადგენილი წესით.
