სამართალი
სურმანიძე 1 მლნ 290 000 ლარის დაბრუნებას ჯერჯერობით უშედეგოდ მოითხოვს

edvard-surmanidzeსაქალაქო სასამართლომ ყოფილი პარლამენტარის - ედვარდ სურმანიძის საქმის არსებითი განხილვა დაიწყო, ხოლო თავად სურმანიძის მიერ გერმანელი ბიზნესმენის - პიტერ შვემლეს წინააღმდეგ ფინანსურ პოლიციასა და გენერალურ პროკურატურაში შეტანილ საჩივრებთან დაკავშირებით, რომლითაც ყოფილი დეპუტატი 1 მლნ 290 000 ლარის დაბრუნებას მოითხოვს, ძალოვანი უწყებები ამ დრომდე დუმან.

სურმანიძის ადვოკატმა მერაბ გვილავამ განაცხადა, ძალოვანი უწყება ვალდებულია, საჩივრის შეტანიდან სამ დღეში მოსარჩელე მხარეს წერილობით აცნობოს, მიიღო თუ არა მან საქმე წარმოებაში, მაგრამ ძალოვან უწყებებში საჩივრის შეტანიდან ერთი თვის შემდეგაც დუმან. შეგახსენებთ, რომ ედვარდ სურმანიძე გერმანელ ბიზნესმენს თაღლითობაში სდებს ბრალს. ადვოკატის მტკიცებით, უცხოელმა სურმანიძეს 5 წლის წინათ აღებული ვალი არ დაუბრუნა და ყოფილი პარლამენტარი ბიზნესმენისთვის სამოქალაქო წესით ვალის გადახდის დაკისრებას მოითხოვს. გვილავას ინფორმაციით, არსებობს ნოტარიულად დამოწმებული დოკუმენტები, რომლებიც ვალის არსებობას ადასტურებს.

 

შეგახსენებთ ასევე, რომ სურმანიძე კონსტიტუციური უსაფრთხოების დეპარტამენტის თანამშრომლებმა 16 ოქტომბერს დააკავეს. მას საქართველოში ჩამოსული გერმანელი ინვესტორისთვის თავისუფლების უკანონოდ აღკვეთა და თანხის გამოძალვის მცდელობა ედება ბრალად. თავად სურმანიძე დანაშაულს ამ დრომდე არ აღიარებს. სურმანიძის პროცესი 15 დეკემბერს, 15:00 საათისთვის, არის დანიშნული.