საზოგადოება
პროკურატურამ სკოლის დირექტორს ბრალი არასრულწლოვანის მიმართ სექსუალური კავშირის იძულებაში წაუყენა

temida-sasworiგურჯაანის რაიონულმა პროკურატურამ ყვარლის რაიონის სოფელ ბალღოჯიანის საჯარო სკოლის ყოფილი დირექტორის – ზურაბ თაბაგარის საქმეზე გამოძიება დაამთავრა. კახეთის საინფორმაციო ცენტრის ინფორმაციით, პროკურატურამ თაბაგარს ბრალი სისხლის სამართლის კოდექსის 139-ე და 332-ე მუხლებით გათვალისწინებული დანაშაულების ჩადენაში წაუყენა.

სისხლის სამართლის კოდექსის 139-ე მუხლი არასრულწლოვანის მიმართ სექსუალური კავშირის იძულებას ითვალისწინებს, ხოლო 332-ე მუხლი – თანამდებობის ბოროტად გამოყენებას. კახეთის საინფორმაციო ცენტრის ინფორმაციით, ზურაბ თაბაგარი თანამდებობის ბოროტად გამოყენებას აღიარებს, რაც სკოლაში არსებულ ფინანსურ დარღვევებს ეხება, მეორე ბრალდებას კი კატეგორიულად უარყოფს. ზურაბ თაბაგარი წინასწარ პატიმრობაშია.