აქტუალური
ავღანეთში, ბაგრამის ბაზაზე ტერაქტის შედეგად ხუთი ქართველი სამხედრო მოსამსახურე დაშავდა (ვიდეო)

 საქართველო, 12 დეკემბერი, საქინფორმი. ავღანეთში, ბაგრამის ბაზაზე ტერაქტის შედეგად ხუთი ქართველი სამხედრო მოსამსახურე მსუბუქად დაშავდა. ამის შესახებ საქართველოს თავდაცვის სამინისტროს განცხადებაშია აღნიშნული (ვიდეო იხ. აქ).

ავღანეთის ისლამურ რესპუბლიკაში, ბაგრამის საავიაციო ბაზაზე ტერორისტების მიერ განხორციელებული თავდასხმის შედეგად მსუბუქად დაშავდა ქართული კონტინგენტის სწრაფი რეაგირების ქვედანაყოფის ხუთი სამხედრო მოსამსახურე.

მე-12 ბატალიონის სამხედრო მოსამსახურეების, კაპრალებისგოჩა მურადაშვილის, სოსო კვინიკაძის და რომან გიუნაშვილის, რიგითი ილია თაყაძის და უფროსი სერჟანტის დავით ბახურაულის ჯანმრთელობის მდგომარეობა სტაბილურია და მათი ჰოსპიტალიზაცია საჭირო არ გამხდარა. მსუბუქი დაზიანებების მიუხედავად, ისინი აგრძელებენ ტერორისტებისგან წმენდისა და სალიკვიდაციო ოპერაციაში მონაწილეობას კოალიციურ ძალებთან ერთად.

თავდაცვის ძალების მართვის ცენტრი გადასულია საგანგებო მდგომარეობაზე. სიტუაციურ ოთახში საქართველოს თავდაცვის მინისტრი ირაკლი ღარიბაშვილი და თავდაცვის ძალების მეთაური, გენერალ-ლეიტენანტი ვლადიმერ ჩაჩიბაია იმყოფებიან და პირდაპირ რეჟიმში აკვირდებიან მოვლენების განვითარებას. ოპერაციის დასრულების შემდეგ, დამატებით ინფორმაციას თავდაცვის უწყება კვლავ გაავრცელებს.

საქართველოს თავდაცვის ძალების მე-12 ბატალიონიმტკიცე მხარდაჭერისსამშვიდობო მისიას ბაგრამის საავიაციო ბაზაზე ნოემბრიდან ასრულებს“, – აცხადებენ თავდაცვის სამინისტროში.