საქართველო, 24 მარტი, საქინფორმი. საქართველოს გენერალურმა პროკურატურამ 22 მარტს გამოძიება დაიწყო „მთავარი არხისა“ და „ტელეკომპანია პირველის“ ეთერში ორი დღის წინ გასულ სიუჟეტებზე, რომლებშიც სავარაუდოდ, სუს-ის ყოფილი თანამშრომელი ივანე გულაშვილი, რომელიც ახლა პატიმრობაშია, მაღალი თანამდებობის პირებს პოლიტიკური და რელიგიური ლიდერების ფარულ მიყურადებასა და სხვა სადავო მითითებების გაცემაში ამხელს.

პროკურატურის ცნობით, საქმეზე გამოძიება ცალკეულ საჯარო მოხელეთა მიერ სამსახურებრივი მდგომარეობის გამოყენებით, კერძო კომუნიკაციის საიდუმლოების შესაძლო დარღვევისა (158-ე) და სამსახურებრივი უფლებამოსილების შესაძლო გადამეტების (333) ფაქტებზე დაიწყო.

ტელეკომპანია „მთავარმა არხმა“ 21 მარტს ივანე გულაშვილთან სავარაუდოდ, წელიწადნახევრის წინ ჩაწერილი ინტერვიუ გაუშვა, რომელშიც მან თქვა, რომ სამართალდამცველ სტრუქტურებში მუშაობის დროს, მას მაღალჩინოსნების მითითებებით მოქალაქეების თვალთვალი ევალებოდა და ბევრი ფარული ჩანაწერი აქვს, რისთვისაც, შესაძლოა, მოკლან. ამავე ინტერვიუში გულაშვილმა ისიც აღნიშნა, რომ 2019 წლის 20 ივნისის ანტისაოკუპაციო აქციის დროს მან შს მინისტრის აწ უკვე ყოფილი მოადგილის კახა საბანაძისგან რამდენიმე სადავო მითითება მიიღო.

ერთი დღით ადრე, გულაშვილის შესახებ სიუჟეტში „ტელეკომპანია პირველმა“ კახა საბანაძის სამუშაო კაბინეტში, სავარაუდოდ, 2019 წლის 21 ოქტომბერს ფარულად გადაღებული ვიდეოდან ამოღებული კადრებიც აჩვენა. „ტვ პირველის“ ვერსიით, საბანაძეს, რომელსაც მაშინ ახლადარჩეულ პრემიერ-მინისტრ გახარიასთან ახლო ურთიერთობა ჰქონდა, უსაფრთხოების სხვა თანამშრომლები უთვალთვალებდნენ.

მედიით გასული სიუჟეტების შემდეგ, კახა საბანაძე თანამდებობიდან გადადგა და თქვა, რომ ფაქტების „სრულყოფილი“ და „ობიექტური“ გამოძიებაა საჭირო.

ჩანაწერების გასვლის შემდეგ, „პირადი ცხოვრების უკანონო ხელყოფის პრაქტიკა“ საქართველოს სახალხო დამცველმა და არასამთავრობო ორგანიზაცია „ახალგაზრდა იურისტთა ასოციაციამ“ (საია) დაგმეს და ხელისუფლებას მყისიერი რეაგირებისა და „მიუკერძოებელი“ და „ეფექტიანი“ გამოძებისკენ მოუწოდეს.

ხაზი გაუსვეს რა, რომ ფარული ჩანაწერებით ბრძოლის სამიზნეები უმეტესწილად ქალი პოლიტიკოსები არიან, ომბუდსმენმა და „საიამ“ ანა დოლიძის მიმართ მხარდაჭერა გამოხატეს. „მთავარ არხთან“ საუბარში ივანე გულაშვილმა თქვა, რომ 2014 წელს, როდესაც უსაფრთხოების ერთ-ერთი მაღალჩინოსნის, ნიკოლოზ შარაძის დაქვემდებარებაში მუშაობდა, რომელიც ამჟამად შსს-ს სასაზღვრო პოლიციის უფროსია, მისგან ანა დოლიძის საცხოვრებელ სახლში სათვალთვალო კამერების დაყენების ბრძანება მიიღო.