როგორც მთავარი პროკურატურის ვებგვერდი იტყობინება, თბილისის საქალაქო სასამართლომ ყოფილ მაღალჩინოსანს, „დემოკრატიული მოძრაობა – ერთიანი საქართველოს“ ლიდერ ნინო ბურჯანაძის მეუღლე ბადრი ბიწაძეს აღმკვეთ ღონისძიებად 100 ათასი ლარის ოდენობის გირაო შეუფარდა.

„2011 წლის 31 მაისს საქართველოს პროკურატურამ შუამდგომლობით მიმართა თბილისის საქალაქო სასამართლოს, სსკ-ის 353-ე მუხლის მე-2 ნაწილით გათვალისწინებულ დანაშაულში ბრალდებულ ბადრი რეზოს ძე ბიწაძის მიმართ აღმკვეთი ღონისძიების სახით გირაოს – ასი ათასი ლარის, გამოყენების შესახებ. 2011 წლის 1 ივნისს სასამართლოს მიერ დაკმაყოფილებულ იქნა პროკურატურის შუამდგომლობა“, – ნათქვამია მთავარი პროკურატურის განცხადებაში.

როგორც ცნობილია, ბიწაძეს ბრალად წინასწარ შექმნილი ჯგუფის მიერ პოლიციაზე თავდასხმების ორგანიზება ედება, რაც 4-დან 7 წლამდე პატიმრობას ითვალისწინებს.

ბადრი ბიწაძის ადგილსამყოფელი ამ დრომდე უცნობია.