საქართველო, 5 მარტი, საქინფორმი. შესაძლოა, საქართველოში ლგბტ-პროპაგანდის გამო ადმინისტრაციული სასჯელი დაწესდეს, მაგრამ ეს ხელს არ შეუშლის საქართველოს ევროკავშირში ინტეგრაციას, განაცხადა საქართველოს მმართველი პარტია „ქართული ოცნება - დემოკრატიული საქართველოს“ ლიდერმა მამუკა მდინარაძემ.

მმართველი პარტია „ქართული ოცნება - დემოკრატიული საქართველო“ ლგბტ-პროპაგანდის აკრძალვის თაობაზე ინიციატივას ამზადებს. როგორც მდინარაძემ განაცხადა, აღნიშნული ინიციატივა საზოგადოებას „ფსევდოლიბერალური იდეოლოგიისგან და მისი გარდაუვალი მავნე შედეგებისგან დაიცავს“. მისივე თქმით, კანონპროექტი უახლოეს ორ კვირაში მომზადდება.

„გაუპატიურებისა და პედოფილიის წინააღმდეგ ყველაზე მკაცრი სასჯელები გვაქვს და ორივე დანაშაული ისჯება, მაგრამ ლგბტ-პროპაგანდისთვის უბრალო ადმინისტრაციული აკრძალვაც კი არ არსებობს“, - განაცხადა მდინარაძემ.

ამასთან, მმართველი პარტიის ლიდერი გამორიცხავს, რომ მსგავსი ზომები ხელს შეუშლის საქართველოს ევროკავშირში შესვლას.

„ან ევროპა, ან ლგბტ-პროპაგანდა - საკითხი ასე არ უნდა დადგეს და არც დგას. ამაზე ფიქრიც არ ღირს. თუ ასე დადგება საკითხი, ეს იქნება დამაზიანებელი. იმედი მაქვს, ვერავინ გაგვიბედავს, რომ ამ ღირსეული მიდგომების გამო ასე დაგვიყენოს საკითხი", - განაცხადა მდინარაძემ.

მისი თქმით, ევროკავშირში გაწევრიანებასთან ერთად, საქართველო აპირებს შეინარჩუნოს თავისი ტრადიციები და ქრისტიანული ღირებულებები, ასევე ეროვნული იდენტობა.

წინასწარი ინფორმაციით, ინიციატივა არ გულისხმობს სექსუალური ორიენტაციის საფუძველზე უფლებებისა და თავისუფლებების შელახვას, იგი შეეხება მხოლოდ ტრადიციული გენდერული იდენტობის წინააღმდეგ და ასევე ლგბტ-თემის ღია პროპაგანდისკენ მიმართული მოწოდებების აკრძალვას და სრულ შესაბამისობაში იქნება საქართველოს კონსტიტუციასთან.

საქართველოს კონსტიტუციით გარანტირებულია ადამიანის უფლებების დაცვა, იგი პირდაპირ კრძალავს დისკრიმინაციას ნებისმიერი ნიშნით, ასევე უზრუნველყოფს პირადი ცხოვრების ხელშეუხებლობას და სიტყვისა და გამოხატვის თავისუფლებას.

მმართველი პარტიის ინიციატივას ექსპერტების ნაწილი სკეპტიკურად უყურებს.

„ინიციატივას რეალობასთან არანაირი კავშირი არ აქვს, ის აშკარად წინასაარჩევნო კამპანიის ნაწილია. საქართველოში ამ თემის აქტუალიზაცია ემსახურება მემარჯვენე, ულტრამემარჯვენე, კონსერვატიული ღირებულებების მატარებელი მოსახლეობის ხმების მობილიზებას არჩევნებისთვის", - განაცხადა ექსპერტმა პაატა ზაქარეიშვილმა.

საქართველოში ეს თემა არ არის აქტუალური, საქართველოში ამაზე არავინ ლაპარაკობს, არც ერთი პოლიტიკური პარტია არ ამბობს, რომ ჩვენ რომ მოვალთ ხელისუფლებაში, აუცილებლად განვახორციელებთ ამ რეფორმებს ლგბტ-თემთან მიმართებით, დასძინა მან.

მზარდი ლიბერალური მოძრაობების ფონზე გენდერის გაუფასურების თემა ქართული საზოგადოების ყურადღების ცენტრში აღმოჩნდა. საქართველოს ხელისუფლება კონსერვატიულ შეხედულებებს ემხრობა. ისინი სულ უფრო და უფრო ხშირად საუბრობენ ოჯახური ღირებულებების და ტრადიციების მნიშვნელობაზე და ლგბტ პროპაგანდის დაუშვებლობაზე.