საქართველო, 15 მარტი, საქინფორმი. ორ თემაზეა საუბარი. ერთია საერთო სასამართლოების შესახებ ორგანულ კანონში შესატან ცვლილებებზე და მეორე - საქართველოს კონსტიტუციაში პროკურორებთან დაკავშირებით შესატან ცვლილებებზე. ორივე კანონპროექტი არის დაინიცირებული. ჩვენ ჩავწერეთ ყველაფერი, რასაც მივიჩნევდით საჭიროდ, - ამის შესახებ საქართველოს პრემიერ-მინისტრმა ირაკლი კობახიძემ ჟურნალისტებთან საუბრისას განაცხადა.

მთავრობის მეთაურის თქმით, ვერავითარი დამატებითი რაციონალური წინადადებები ვერ წარმოადგინა ოპოზიციამ და აქედან გამომდინარე, გაგრძელდება პროცესი და ეს კანონები აუცილებლად იქნება ბოლომდე მიყვანილი.

„რაც შეეხება საკონსტიტუციო ცვლილებებს, რომელიც უკავშირდება პროკურორს, არის აბსურდული შემოთავაზებები ამასთან დაკავშირებით, მათ შორის იყო აბსურდული ჩანაწერი, რომელიც 19 აპრილის შეთანხმებაში შევიდა. სწორედ ამ აბსურდულ ჩანაწერს ეფუძნებოდა ის კანონპროექტი, რომელიც დაინიცირდა და პირველი მოსმენით იქნა მიღებული საქართველოს პარლამენტში. თუმცა იმდენად აბსურდულია ეს კანონპროექტი, რომ ჩვენ ვფიქრობთ ამ კანონის არ მიღებას. ეს არის ჩემი, როგორც კონსტიტუციონალისტის და როგორც პოლიტიკური გუნდის ერთ-ერთი წარმომადგენლის პოზიცია. მსოფლიოში არსად არ არის ის რეგულაცია, რომლის მიღებასაც გვთხოვენ და ის, რომ არ არის არსად ასეთი რეგულაცია, ამას აქვს კონკრეტული საფუძველი. მთავარი საფუძველი არის აბსურდულობა, ირაციონალურობა. კეთილი ინებოს ყველამ და წარმოადგინოს სამართლებრივი არგუმენტები.

მე პირადად მქონდა არაერთი შეხვედრა ევროკავშირის წარმომადგენლებთან, სადაც დავასაბუთე არგუმენტებით, რომ ეს კანონპროექტი არის აბსურდული. ვერავითარი კონტრარგუმენტი ვერ მოვისმინე ამასთან დაკავშირებით. დაველოდები მომავალშიც კონტრარგუმენტებს. ჩვენ გვაქვს თმენის ძალიან დიდი რესურსი, გამოცდილება. მოვითმენთ, დაველოდებით, თუ წარმოადგენენ არგუმენტებს, რა თქმა უნდა, მზად ვართ გავიზიაროთ, მაგრამ დღემდე ვერც ერთი ასეთი არგუმენტი ვერ წარმოგვიდგინეს“, - აღნიშნა პრემიერ-მინისტრმა.