პუბლიკაციები
თბილისი, 9 სექტემბერი. საქინფორმი. როგორც რუსთაველის თეატრის ყოფილმა სამხატვრო ხელმძღვანელმა რობერტ სტურუამ „ობიექტივთან“ საუბრისას განაცხადა, შეთავაზების მიუხედავად, რუსთაველის თეატრში დაბრუნებას არ აპირებს, რადგან თვლის, რომ ეს კახპას საქციელი იქნება.
ინტერვიუში მან ქართველი მსახიობებისა და რეჟისორების შესახებაც ისაუბრა და აღნიშნა, რომ მათზე გული სწყდება.
„ამათ თეატრი არ უნდათ. ამათ მიუზიკლები და სიმღერები უნდათ. „ქეთო და კოტე“ ჩემთვის აბსოლუტურად მიუღებელია. ბოდიშს ვუხდი დოიაშვილს... მწყინს, რომ არც დოიაშვილი, არც ჭოლა და არც სხვა რეჟისორები, რომელთაც პატივს ვცემ, არ გამომესარჩლნენ“, – აღნიშნა სტურუამ.
შეგახსენებთ, რომ რობერტ სტურუა შოთა რუსთაველის სახელობის სახელმწიფო დრამატული თეატრის სამხატვრო ხელმძღვანელის თანამდებობიდან კულტურისა და ძეგლთა დაცვის მინისტრმა ნიკა რურუამ მიმდინარე წლის 9 აგვისტოს გაათავისუფლა. მიზეზად მინისტრმა სტურუას ქსენოფობიური განცხადებები და შეხედულებები დაასახელა. თუმცა იმას, რაზეც რურუა საუბრობდა, სინამდვილეში ქსენოფობიასთან არანაირი კავშირი არ ჰქონდა. სტურუამ საინფორმაციო-ანალიტიკურ სააგენტო „საქინფორმთან“ ინტერვიუში საქართველოს პრეზიდენტის სომხური წარმომავლობა ახსენა და ამით ახსნა ის გარემოება, რომ სააკაშვილს ქართველივით არ შეიძლება უყვარდეს საქართველო, რაც ქსენოფობიურ განცხადებად ნამდვილად არ ძეიძლება ჩაითვალოს.