თბილისი, 14 სექტემბერი, საქინფორმი. როგორც საქართველოში ევროკომისიის დელეგაციის პრესისა და ინფორმაციის სამსახურიდან საქინფორმს ატყობინებენ, ევროკავშირის წარმომადგენლობის ორგანიზებით 15 სექტემბერს, 10 საათზე, სასტუმრო „რედისონ ბლუ ივერიაში“ ჩატარდება სამუშაო შეხვედრა „სამოქალაქო საზოგადოება და აღმოსავლეთ პარტნიორობა – შესაძლებლობები და გამოწვევები“.

შეხვედრას განსაკუთრებული მნიშვნელობა ენიჭება 29-30 სექტემბერს ვარშავაში დაგეგმილი აღმოსავლეთ სამეზობლოს სამიტისა და კონფერენციის – „სვლა დემოკრატიული, კეთილდღეობასა  და ძლიერ სამოქალაქო საზოგადოებაზე ორიენტირებული ევროპული თანამეგობრობისკენ“ –  კონტექსტში, რადგან სამოქალაქო საზოგადოების ეროვნული პლატფორმის წარმომადგენლებს შესაძლებლობა ექნებათ, მეტი ინფორმაცია მიიღონ დაგეგმილი სამიტისა და კონფერენციის შესახებ.

შეხვედრაზე განიხილება ევროპის სამეზობლოს საკითხები საქართველოში ევროკავშირის წარმომადგენლობის, სამოქალაქო საზოგადოების ეროვნულ პლატფორმასა და ხელისუფლებას შორის თანამშრომლობის კონტექსტში, რადგან მას საფუძვლად უდევს ევროკავშირის მიერ 2001 წლის მაისში მიღებული დოკუმენტი „ახალი პასუხი  სამეზობლოში მიმდინარე ცვლილებებზე“, რომლის მიხედვითაც სასურველია, სამოქალაქო საზოგადოებამ უფრო მეტი წვლილი შეიტანოს აღმოსავლეთ პარტნიორობის ქვეყნებში მიმდინარე პროცესებში და გააქტიურდეს თანამშრომლობა სამოქალაქო საზოგადოებასა და ხელისუფლებას შორის ევროპის სამეზობლო პოლიტიკის ძირითად საკითხებში.