საქართველო, 10 აპრილი, საქინფორმი. ჩინეთიდან ევროპისკენ ტვირთების ტრანსპორტირება ამჟამად კასპიის ზღვისა და ბაქო-თბილისი-ყარსის (BTK) სარკინიგზო მაგისტრალის მეშვეობით მიმდინარეობს, თუმცა პარალელურ მარშრუტად ზანგეზურის დერეფანი განიხილება.

აზერბაიჯანის სახელმწიფო სააგენტო Report-ის ინფორმაციით, ამის შესახებ თურქეთის ტრანსპორტისა და ინფრასტრუქტურის მინისტრმა აბდულქადირ ურალოღლუმ განაცხადა.

მინისტრის განმარტებით, საქართველოზე გამავალი ტვირთბრუნვის მოცულობა დიდი არ არის, ამიტომ ზანგეზურის დერეფანი ალტერნატიულ გზად განიხილება.

„აღნიშნული დერეფანი აღმოსავლეთით კასპიის ზღვის გავლით გაგრძელდება. ჩვენ აქტიურად ვმუშაობთ მის ასამოქმედებლად. პროექტის თურქული მონაკვეთის სიგრძე 224 კილომეტრია, რომლის მშენებლობასაც საფუძველი 2025 წელს ჩაეყარა“, - განაცხადა მინისტრმა.

ურალოღლუმ ასევე ხაზი გაუსვა, რომ აზერბაიჯანული მხარე დერეფანზე სამუშაოების დასრულებას უახლოვდება:

ნახჭევანის მონაკვეთი: სამუშაოების უდიდესი ნაწილი უკვე შესრულებულია.

„შუა დერეფნის“ პერსპექტივა: მშენებლობის სრულად დასრულების შემდეგ, ჩინეთისა და ევროპის დამაკავშირებელი „შუა დერეფანი“ ორ ძირითად არტერიას ბაქო-თბილისი-ყარსისა და ზანგეზურის ხაზებს დაეყრდნობა.

მინისტრის თქმითვე, ეს პროექტი არა მხოლოდ ეკონომიკური თვალსაზრისითაა მნიშვნელოვანი, არამედ წარმოადგენს უმოკლეს გზას ცენტრალური აზიისა და თურქეთს შორის.