საქართველო, 17 სექტემბერი, საქინფორმი. აზერბაიჯანის პრეზიდენტმა ილჰამ ალიევმა მკაცრად გააკრიტიკა ევროპარლამენტი და მას კორუმპირებულთა ბუდე უწოდა. „ამას სრული პასუხისმგებლობით ვამბობ: ევროპარლამენტი კორუმპირებულთა ბუდეა!“ - განაცხადა ალიევმა სამშაბათს, ბაქოში თურქულენოვან სახელმწიფოთა ორგანიზაციის (თსო) გენერალური მდივნის, ყუბანიჩბეკ ომურალიევის, აგრეთვე თსო-ს მუსლიმთა რელიგიური სამმართველოების ხელმძღვანელთა საბჭოს წევრებისა და დამკვირვებლების მიღებისას.

მისი თქმით, ევროპარლამენტის ერთ-ერთი ვიცე-პრეზიდენტის, საბერძნეთის წარმომადგენლის (ევა კაილი, რომელიც 2022 წლის დეკემბერში კორუფციის ბრალდებით დააკავეს) სახლიდან „მილიონობით დოლარით სავსე ჩემოდნები ამოიღეს, მაგრამ ეს ყველაფერი მიჩქმალეს“.

ალიევმა ხაზგასმით აღნიშნა, რომ იმის პარალელურად, თუ როგორ ძლიერდება აზერბაიჯანი და სრულად იყენებს თავის პოტენციალს, დასავლეთში რესპუბლიკის წინააღმდეგ კვლავ იშლება „ბინძური“ მედიაკამპანია. „ჩვენ სახელს გვიტეხენ, აზერბაიჯანის შესახებ ყოველდღიურად ქვეყნდება სიცრუით, ინსინუაციებითა და ცილისწამებით სავსე სტატიები“, - აღნიშნა სახელმწიფოს მეთაურმა.

   საქინფორმი შეგახსენებთ, რომ 2026 წლის 1 მაისს აზერბაიჯანის მილი მეჯლისმა ევროპარლამენტთან ყველა მიმართულებით თანამშრომლობა შეაჩერა მას შემდეგ, რაც მიღებულ იქნა რეზოლუცია „სომხეთში დემოკრატიული მდგრადობის მხარდაჭერა“. შესაბამისი დადგენილება პარლამენტის სხდომაზე დაამტკიცეს. ამავდროულად, მეჯლისმა გადაწყვიტა შეწყვიტოს მონაწილეობა ევროკავშირი-აზერბაიჯანის საპარლამენტო თანამშრომლობის კომიტეტში და დაიწყოს საპარლამენტო ასამბლეა „ევრონესტის“ წევრობის შეჩერების პროცედურა.

ბაქოში განაცხადეს, რომ „ევროპარლამენტის დესტრუქციული პოზიცია მთავარ დაბრკოლებად იქცა ამ სტრუქტურასთან ორმხრივი და მრავალმხრივი თანამშრომლობის განვითარებისთვის“. ასევე, დადგენილებაში მითითებულია, რომ ევროპარლამენტის ქმედებები ხელს უშლის რეგიონში გრძელვადიანი მშვიდობის მიღწევისკენ მიმართულ ნაბიჯებს და წარმოადგენს მცდელობას, „ის კვლავ კონფლიქტის კერად აქციოს, რევანშისტული ძალების წაქეზებით“. „ყოველივე ეს ევროპარლამენტთან თანამშრომლობას უაზროს ხდის“, — აღნიშნულია დოკუმენტში.

მანამდე აზერბაიჯანის საგარეო საქმეთა სამინისტრომ ბაქოში ევროკავშირის ელჩი მარიანა კუიუნჯიჩი დაიბარა და მას საპროტესტო ნოტა გადასცა 30 აპრილს ევროპარლამენტის მიერ რეზოლუციის მიღების შემდეგ. „შეხვედრაზე აზერბაიჯანულმა მხარემ გადაჭრით დაგმო ჩვენი ქვეყნის მიმართ ევროპარლამენტის 30 აპრილის რეზოლუციაში შემავალი უსაფუძვლო და მიკერძოებული დებულებები. ამასთან დაკავშირებით ელჩს საპროტესტო ნოტა გადაეცა“, — განაცხადეს უწყებაში.

ბაქოში განაცხადეს, რომ დოკუმენტი „ამახინჯებს რეალობას, ეწინააღმდეგება ობიექტურობის პრინციპებს, ასევე სახელმწიფოების სუვერენიტეტისა და ტერიტორიული მთლიანობის პატივისცემის ვალდებულებებს“ და უარყოფითად მოქმედებს რეგიონში ნორმალიზაციის პროცესზე.

ცალკე, საგარეო საქმეთა სამინისტრომ უარყო თეზისები მთიან ყარაბაღში სომხური      მოსახლეობის დაბრუნების შესახებ და ასეთ განცხადებებს შიდა საქმეებში ჩარევა უწოდა. უწყებაში ხაზგასმით აღნიშნეს, რომ მცხოვრებლებმა რეგიონი ნებაყოფლობით დატოვეს, შეთავაზებული რეინტეგრაციის გეგმის მიუხედავად.

ასევე ბაქოში იურიდიულად უსაფუძვლო უწოდეს მოწოდებებს სომხური წარმოშობის პირების განთავისუფლების შესახებ, რომლებიც წარმოდგენილნი არიან როგორც „სამხედრო ტყვეები“, და აღნიშნეს, რომ საუბარია მძიმე დანაშაულებისთვის, მათ შორის ტერორიზმისა და დივერსიისთვის მსჯავრდებულ ადამიანებზე. აზერბაიჯანმა ასევე უარყო ბრალდებები კულტურული მემკვიდრეობის განადგურების შესახებ და აღნიშნა, რომ კონფლიქტის პერიოდში მის ტერიტორიაზე არსებულ ნგრევას ევროპული სტრუქტურების მხრიდან სათანადო შეფასება არ მოჰყოლია. საგარეო საქმეთა სამინისტრომ მოუწოდა ევროკავშირს, არ დაუშვას ისეთი ნაბიჯები, რომლებიც, მათი აზრით, ძირს უთხრის ურთიერთობებს და ხელს უშლის მოგვარების პროცესს.